Bojxonachilar 3,8 mlrd. so‘mlik televizorlarning noqonuniy olib kirilishini fosh qilishdi
11.02.2019
Rukn: Yangiliklar.
Muallif: .

Davlat bojxona xizmati organlari tomonidan respublikamiz hududiga tovar-moddiy boyliklarning bojxona chegaralari orqali noqonuniy ravishda olib kirilishining oldini olish maqsadida keng ko‘lamli chora-tadbirlar amalga oshirilmoqda.

Shunga qaramay, ayrim qo‘shtirnoq ichidagi tadbirkorlar tomonidan tovarlarni bojxona nazoratidan chetlab yoki yashirincha olib kirishga bo‘lgan urinishlar, buning uchun esa turli hiyla-nayranglarni ishga solish holatlari hamon ko‘zga tashlanmoqda.

Yaqinda Davlat bojxona qo‘mitasi va Davlat xavfsizlik xizmati xodimlari tomonidan hamkorlikda o‘tkazilgan tadbirda ana shunday noqonuniy faoliyat bilan shug‘ullanuvchi jinoiy guruhning kirdikorlari fosh qilindi.

Qo‘shni davlatdan Toshkent viloyati bojxona boshqarmasining “Yallama” chegara-bojxona posti orqali respublikamizga kirib kelgan, qo‘shni davlat fuqarosi boshqaruvidagi yuk avtotransport vositasiga tegishli hujjatlar ko‘zdan kechirilganida, bojxona xodimlarni shubhalantirgan ayrim jihatlar namoyon bo‘ldi.

Hujjatlarga ko‘ra, respublikamizdan go‘yoki tranzit tarzida o‘tayotgan mazkur yuk avtotransport vositasiga ortilgan yuklarning invoys hujjatlari qarang-ki, 2 xil ekan. Ularning biri respublikamizga kirib kelishda bojxona organlariga taqdim qilish uchun mo‘ljallangan bo‘lib, unga ko‘ra avtotransport vositasiga qiymati 17 ming AQSh dollaridan ortiq bo‘lgan 2482 dona televizorlar va 200 dona issiqlik radiatorlari ortilgani qayd qilingan. Ammo chegaradan chiqib ketish davomida bojxona organlariga taqdim qilinishi lozim bo‘lgan soxta invoysda esa issiqlik radioatorlari 100taga kamaytirib ko‘rsatilgan, televizorlar o‘rniga esa kulolchilikda qo‘llaniladigan materiallar, ko‘rpa-to‘shaklar va turli g‘iloflar borligi aks ettirilgan.

Hujjatlardagi nomuvofiqliklarga oydinlik kiritish maqsadida mazkur yuk avtotransport vositasi belgilangan tartibda bojxona ko‘rigidan o‘tkazilganda, unga 4 turdagi 2680 dona chet elda ishlab chiqarilgan televizorlar ortilgani aniqlandi. Ularning umumiy qiymati dastlabki hisob-kitoblarga ko‘ra 3 mlrd. 816 mln. so‘mni tashkil qilmoqda.

Demak, jinoiy guruhning hiylasiga ko‘ra respublika hududidan go‘yoki tranizt tarzida o‘tkazilayotgan mazkur televizorlar aslida, ichki hududda tushirib qoldirilishi va ularning o‘rniga chiqib ketishda boshqa tovarlar ortilishi rejalashtirilgan. Jinoiy guruh a’zolari ushbu kontrabanda mahsulotlarini respublikamiz hududida tushirib qoldirish rejasi fosh qilinishining oldini olish maqsadida bojxona xodimlarini pora evaziga og‘dirishga harakat qilib, bojxona xodimlariga 9 ming AQSh dollarini pora sifatida taklif qildilar. Biroq ularning bu nayrangi ham naf bermadi.

Hozirda mazkur holat yuzasidan O‘zbekiston Respublikasi Jinoyat kodeksining bir nechta moddalari bilan jinoyat ishi qo‘zg‘atildi. Shuningdek, jinoiy guruhning qolgan a’zolarini ham fosh qilish va ularga nisbatan jazo muqarrarligini ta’minlash yuzasidan tezkor tadbirlar davom ettirilmoqda.

Husan Tangriyev, Davlat bojxona qo‘mitasi Axborot xizmati bosh inspektori

Manba

Orphus system
O'zbеkistonda AKT yangiliklaridan birinchilar qatorida xabardor bo'lish uchun Telegramda infoCOM.UZ kanaliga obuna bo'ling.
Telegramga qo`shmoq
WhatsAppga qo`shmoq
Odnoklassnikiga yubormoq
VKontakteda bo`lishmoq