Axborot texnologiyalari va kommunikatsiyalari sohasida 2015 yilning I yarim yilligida amalga oshirilgan ishlar sarhisob qilindi
28.07.2015
Rukn: Sharh va fikr-mulohazalar.
Muallif: .

2015 yilning 27 iyul kuni Axborot texnologiyalari va kommunikatsiyalarini rivojlantirish vazirligi Hay’atining 2015 yilning I yarim yilligida axborot texnologiyalari va kommunikatsiyalarini rivojlantirish, joriy qilish bo‘yicha amalga oshirilgan ishlar sarhisobi, istiqboldagi vazifalarga bag‘ishlangan majlisi bo‘lib o‘tdi.

Yig‘ilishda Vazirlikning rahbar va mas’ul xodimlari, hududiy boshqarma boshliqlari, axborot texnologiyalari va kommunikatsiyalari sohasida faoliyat yurituvchi aksiyadorlik kompaniyalari, korxonalar va tashkilotlar va ularning hududiy rahbarlari ishtirok etishdi. Shuningdek sohaning hududiy tashkilotlari xodimlari yig’ilishni videokonferensiya shaklida kuzatib borishdi.

Hay’at yig‘ilishida ta’kidlanganidek, 2015 yilning I yarim yilligi mobaynida axborot texnologiyalari va kommunikatsiyalarini rivojlantirish tizimida faoliyat ko‘rsatayotgan korxonalar tomonidan ko‘rsatilgan xizmatlar hajmi oldingi yilning shu davriga nisbatan 25,4 % ga oshib, 2,17 trln. so’mni tashkil etmoqda. Jumladan, aholiga bu yo’nalishda 1,5 trln. so’mlik xizmatlar ko‘rsatilgan ( o’sish hajmi 23,5 %). Shuningdek, komyuter dasturlari bilan bog‘liq 110,1 mlrd. so’mlik xizmatlar ko’rsatilgan (16,8 % ga oshgan).

Bugungi kunda xalqaro axborot tarmoqlaridan foydalanish umumiy tezligi yil boshiga nisbatan 30 % ga o‘sib, 21,25 Mbit/s.ni tashkil qilmoqda. Operator va provayderlar uchun internet-xizmatlari (tashqi kanal) tarifi Xalqaro kommutatsiya markazi paketlari bilan birga yil boshi bilan solishtirganda 20,2 foizga, aniqrog‘i 1 Mbit/s. uchun 206,97 AQSh dollarigacha, 2014 yilning shu davri bilan solishtirganda 32,5 %ga kamaytirildi.

Yurtimiz miqyosida zamonaviy texnologiyalar asosida kengpolosali aloqani ta’minlovchi 1050 km.dan ortiq optik tolali aloqa liniyasi qurildi. Natijada ushbu tarmoq orqali mijozlarga videotelefoniya, internet-televideniye, yuqori tezlikdagi internet, HDTV-kanallar va boshqa xizmatlarni ko‘rsatish imkoni yaratildi.

Mamlakatimiz hudularining raqamli televideniye signallari bilan qamrovini kengaytirish yuzasidan ham bosqichma-bosqich ishlar amalga oshirilmoqda. Ayni vaqtda yurtimiz hududining 54 %i qamrab olingan bo’lsa, yil oxiriga qadar o’rnatish nazarda tutilgan 19 ta raqamli teleuzatkichlar orqali bu ko’rsatkichni 70%ga yetkazish rejalashtirilgan.

“UZ” hududidagi domenlar soni bu davrda 21,86 mingtaga yetdi. Mazkur ko‘rsatkichlar milliy internet hududining jadal rivojlanayotganidan darak beradi. Hay’at majlisida Milliy kontentni rivojlantirish yo‘nalishda zarur chora-tadbirlarni amalga oshirish kerakligi qayd etildi.

Shu bilan birga, ushbu davr oralig‘ida e-hukumatning muhim elementlari hisoblangan Yagona interaktiv davlat xizmatlari hamda Ochiq ma’lumotlar portallarining yuqori sur’atlarda rivojlanib borayotgani ham kuzatildi. 2015 yilning mart oyida www.data.gov.uz manzilida ishga tushirilgan Ochiq ma’lumotlar portaliga shu kunga qadar 464 ta ochiq ma’lumotlar joylashtirildi. Yil boshidan buyon

Yagona portalda 19 ta yangi xizmat joriy qilinib, ko’rsatilayotgan xizmatlar soni 449 taga yetdi. U orqali fuqarolar va tadbirkorlarga umumiy holatda 274 mingdan ortiq elektron xizmatlar ko‘rsatildi. 82 dan ortiq tadbirkorlik subyektlari tashqi savdo shartnomalarini Yagona portal orqali to‘ldirgan. Ayni kunda Portal foydalanuvchilarining 55%ini tadbirkorlik subyektlari tashkil etmoqda.

Shuningdek, me’yoriy-huquqiy hujjatlarning tadbirkorlik faoliyatiga ta’sirini o’rganish maqsadida, www.regulation.gov.uz portali ishga tushirildi. Bugungi kunda mazkur portalda 144 ta me’yoriy hujjat loyihasi e’lon qilinib, ularga nisbatan 270 dan ziyod fikr-mulohazalar bildirilgan.

Mahalliy dasturiy mahsulotlar bozorini rivojlantirishga ham alohida e’tibor qaratilmoqda. Mahalliy dasturiy ta’minot ishlab chiqaruvchilarni rag‘batlantirish chora-tadbirlarini amalga oirish doirasida dasturchilarning Milliy reyestri tuzilib, unga 159 mahalliy kompaniya kiritilgan. Software.uz katalogiga 1706 ta mahalliy dasturiy mahsulotlar kiritildi.

Mamlakatimiz rahbarining iqtisodiyotning real sektorida axborot-kommunikatsiya texnologiyalarini yanada joriy qilish bo‘yicha qarorlariga muvofiq aksionerlik kompaniyalar, birlashmalar va yiriq xo‘jalik korxonalarida axborot tizimlari va dasturiy mahsulotlarni joriy qilish bo‘yicha umumiy qiymati 336 mlrd. so‘m bo‘lgan 86 ta loyihalar amalga oshirilmoqda, shulardan umumiy qiymati 24,0 mlrd sumga teng 41 ta loyihalar bo‘yicha ishlar yakuniga yetkazilgan.

Joriy yilning mart oyidan buyon TATU professor-o‘qituvchilarining 12 nafari Janubiy Koreyaning yetakchi oliy ta’lim muassasalarida malaka oshirish uchun yuborildi. Universitet tomonidan 2014/2015 o‘quv yilida 62 ta mutaxassislik fanlarini chet tilida o‘qitish yo‘lga qo‘yildi. Universitetning ilmiy salohiyatli kadrlari soni 2015 yilning 2-chorak yakuni holatiga 229 nafar (30,8 foiz)ga yetdi hamda yil boshiga qaraganda 22 nafar (2,8 foiz)ga o‘sdi.

Vazirlik va idoralarning taqdim qilingan talabnomalariga muvofiq, 2015 yilda Toshkent axborot texnologiyalari universiteti va uning filiallari tomonidan 50 223 nafar davlat va ho‘jalik boshqaruvi hamda mahalliy hokimiyat organlari xodimlarini o‘qitish rejasi tuzildi (2014 yilga nisbatan 177 foizga ko‘p). Shundan, 2015 yil 1 yarim yil yakunlariga ko‘ra, 14 500 nafar davlat xodimlari o‘qitildi.

2015 yil 1 yarim yil yakunlariga ko‘ra, “Elektron hukumat” o‘quv markazi tomonidan 14 500 nafar va “Elektron hukumat” tizimini joriy etish bo‘yicha o‘quv kursi 1340 nafar davlat va ho‘jalik boshqaruvi organlari xodimlari o‘qitildi.

Bundan tashqari Vazirlar Mahkamasi komplekslarining Oliy ta’lim muassalari qoshidagi 12 ta tayanch o‘quv markazlari tomonidan hisobot davrida 2180 nafar xodim o‘qitildi.

Avtomatlashtirilgan pochta ob’ektlari soni 1729 taga yetkazilib, o‘tgan yilning shu davriga nisbatan o‘sish 1,2%ni tashkil qiladi. Avtomatlashtirilgan ish o‘rinlari soni 2856 taga yetkazildi (o‘tgan yilning shu davriga nisbatan o‘sish 6,4%). Elektron pul o‘tkazmalari tizimiga 2015 yil 1 iyul xolatiga jami 1723 ta pochta aloqa ob’ektlarining ish o‘rinlari bog‘lanib xizmat ko‘rsatib kelmoqda, 2014 yil 1 iyul xolatiga bu ko‘rsatkich 1479 ta bo‘lgan.

Hay’at yig‘ilishida O‘zbekiston Respublikasi Prezidenti tomonidan 2015-2019 yillarda ishlab chiqarishni tarkibiy o‘zgartirish, modernizatsiya va diversifikatsiya qilishni ta’minlash bo‘yicha chora-tadbirlar dasturida Axborot texnologiyalari va kommunikatsiyalarini rivojlantirish vazirligi va uning tizimidagi korxonalarga yuklatilgan vazifalarning bajarilishi bo‘yicha olib borilayotgan ishlar muhokama qilindi.

Shu bilan birga, yig’ilishda sohada fuqarolar murojaatlari bilan ishlash va ijro intizomi holatining tahliliga oid ma’lumot tinglandi. Jumladan, 2015 yilning 6 oyi mobaynida Vazirlik va uning tizimidagi muassasalarga 2147 ta murojaat bo’lgan. Ularning 1630 tasini shikoyatlar tashkil etsa, shulardan 188 tasi bevosita tizimdagi korxona va tashkilotlar faoliyatiga daxldor. Muassasa va tashkilotlar rahbarlariga bu yo’nalishda mavjud kamchiliklarni bartaraf qilishga oid topshiriqlar berildi.

Hay’at yig’ilishida yil oxiriga qadar soha oldida turgan vazifalar belgilab olindi. Jumladan,

    — idoralararo “Ijro intizomi” tizimini Vazirlar Mahkamasi ijro apparati, vazirliklar, davlat qo‘mitalari, idoralar va xo‘jalik birlashmalarining viloyat, hududiy boshqarmalari va bo‘linmalari, tuman bo‘linmalari, Qoraqalpog‘iston Respublikasi, viloyatlar va Toshkent shahar, tuman hokimliklari va bo‘linmalari tomonidan to‘liq ishlashtishlarini ta’minlash choralarini ko‘rish;
    — “Keksalarni e’zozlash yili” Davlat dasturi ijrosini ta’minlash bo‘yicha, 1941-1945 yillardagi urush va mehnat fronti faxriylarini sanatoriy — kurortlarda sog‘lomlashtirishni elektron hisobga olish va nogironlarni protez-ortopedik va realbilitatsiya vositalari bilan ta’minlashni hisobini yurituvchi maxsus “Protez” axborot tizimlarini yaratish hamda “Nuroniy” jamg‘armasi bilan hamkorlikda “Nuroniy.uz” ixtisoslashtirilgan internet-portalini ishga tushirish;
    — “Elektron hukumat” tizimini rivojlantirish dasturini bajarish yuzasidan jismoniy va yuridik shaxslar ma’lumotlar bazalarini, “Tadbirkorlik”, “Notarius”, kadastr va ko‘chmas mulkni ro‘yxatga olish axborot tizimlarini joriy qilish bo‘yicha muhim loyihalarni joriy yil yakuniga qadar amalga oshirilishini ta’minlash;
    — Joriy yilning 1 sentyabriga qadar davlat xizmatlari, shakllari va blanklari Yagona reyestrini to‘liq shakllantirilishini ta’minlash;
    — “Yagona oyna” markazlarida xizmat ko‘rsatuvchi vazirlik va idoralarga ma’muriy jarayonlarini reinjiniring tadbirlari orqali optimallashtirish va qonunchilik hujjatlariga tegishli o‘zgartirish va qo‘shimchalar kiritish yuzasidan amaliy yordam berish hamda ularni idoralararo axborot almashinuvi tizimiga ulanishlarini ta’minlash;
    — Yagona interaktiv davlat xizmatlari portalida tadbirkorlik sub’ektlari uchun litsenziya, ruxsat etish hujjatlarini rasmiylashtirish, hisobotlarni elektron shaklda taqdim etish, ko‘rsatilayotgan davlat xizmatlar uchun to‘lovlarni elektron shaklda to‘lash kabi 20 ta ustuvor interaktiv xizmatlarni joriy etish va bunda ularni soddalashtirish va ko‘rib chiqish muddatlarini keskin kamaytirish choralarini ko‘rish;
    — Xitoy taraqqiyot bankining kredit mablag‘lari hisobiga amalga oshirilayotgan “O‘zbektelekom” AK magistral tarmoqlarini O‘zbekiston Respublikasi tuman markazlarigacha kengaytirish va ishonchliligini oshirish” va “Keng polosali ma’lumotlar uzatish tarmoqlarini yanada kengaytirish” loyihalari doirasida joriy yilning 3-choragi yakuniga qadar keltirish va yil yakuniga qadar ishga tushirish;
    — 2015 yilning Investitsiya dasturiga asosan respublika bo‘yicha 1,8 ming km optik tolali aloqa liniyalari qurish rejasini to‘liq bajarilishi;
    — Raqamli televideniyeni rivojlantirish loyihasi bo‘yicha rejadagi uzatkichlarni keltirish (19 ta) va yil yakunigacha respublika aholisini raqamli televideniye bilan qamrovini 70 %ga yetkazish;
    — Davlat va xo‘jalik boshqaruvi organlari, hamda tadbirkorlik sub’ektlariga videokonferensiya rejimida yig‘ilish, seminar va boshqa turdagi ommaviy tadbirlarni masofadan o‘tkazish imkonini yaratish maqsadida, viloyat markazlarida 13 ta multimedia studiyalarini joriy yil yakunigacha ishga tushirish;
    — Toshkent shahrida ma’lumotlarni saqlash va qayta ishlash markazini yaratish loyihasi bo‘yicha qurilmalarni keltirish va joriy yil yakuniga qadar montaj ishlarini yakuniga yetkazish kabi vazifalar qayd etildi.

Hay’at yig‘ilishida muhokama qilingan barcha masalalar yuzasidan tegishli qarorlar qabul qilindi.

Manba

Orphus system
O'zbеkistonda AKT yangiliklaridan birinchilar qatorida xabardor bo'lish uchun Telegramda infoCOM.UZ kanaliga obuna bo'ling.
Telegramga qo`shmoq
WhatsAppga qo`shmoq
Odnoklassnikiga yubormoq
VKontakteda bo`lishmoq