Global Internet tarmog‘iga ulanishning o‘tkazish qobiliyatini bosqichma-bosqich kengaytirish loyihasi haqida
07.05.2015
Rukn: Internet.
Muallif: .

tel_7_05_2015

Ilg‘or axborot texnologiyalarining jadal rivojlanishi va ulardan kundalik hayotimizda faol foydalanishi sharoitlarida, respublikamizda telekommunikatsiya infrastrukturalarini rivojlantirish maqsadida “O‘zbektelekom” AK tomonidan davlat organlari, korporativ mijozlar hamda aholiga Internetga xalqaro tezkor ulanishni taqdim etish uchun yangi bog‘lama va ma’lumotlar uzatish tarmoqlarini qurish bo‘yicha loyihalar amalga oshirilmoqda.

“O‘zbektelekom” AK zimmasidagi vazifalarni o‘z vaqtida va sifatli amalga oshirish uchun 2005-yilda Internet provayderlarga global Internet tarmog‘i resurslariga ulanishni ta’minlovchi “O‘zbektelekom” AK Xalqaro paketli kommutatsiya markazi (XPKM) tashkil etilgan.

Foydalanuvchilarning Internet xizmatlariga bo‘lgan talab va ehtiyojlarini yanada to‘liq ta’minlash, shuningdek, kelgusida ma’lumotlar uzatish tarmoqlari xizmatlarini rivojlantirish uchun 2011-yilda Toshkent shahrida XPKM vositalari texnik o‘tkazish qobiliyati 2,5 Gbit/s.dan 10 Gbit/s.gacha (4 marta), 2012-yilda esa 10 Gbit/s.dan 40 Gbit/s.gacha (4martа) kengaytirildi.

O‘zbekiston Respublikasi hududida xalqaro aloqa xizmatlariga ehtiyoj hamda o‘sib borayotgan talablarni, shuningdek, tranzit sig‘imiga bo‘lgan tаlab va ehtiyojlarni hisobga olib hamda O‘zbekiston Respublikasida Internet xizmatlarini yanada rivojlantirish bo‘yicha kechiktirib bo‘lmaydigan chora-tadbirlarni qabul qilish uchun mavjud o‘tkazish qobiliyatini oshirish va chegaradosh mamlakatlar operatorlari bilan yangi chegaraga o‘tish nuqtalarini qurish bo‘yicha loyihalar amalga oshirildi. Xususan, Qo‘ng‘irod (O‘zbekiston) — Beyneu (Qozog‘iston), Paxta (O‘zbekiston) — Abay (Qozog‘iston), Keles (O‘zbekiston) – Jibik Joli q. (Qozog‘iston), Keles (O‘zbekiston) – Sarag‘och (Qozog‘iston), Denov (O‘zbekiston) – Chirtak (Tojikiston), Andijon (O‘zbekiston) – Osh (Qirg‘iziston), Olot (O‘zbekiston) — Turkmanobоd (Turkmaniston), Termiz (O‘zbekiston) – Hayraton (Afg‘oniston) va boshqa uchastkalarda xorijiy mamlakatlar operatorlari bilan yangi o’tish nuqtalari foydalanishga topshirildi.

Yuqorida amalga oshirilgan chora-tadbirlar natijasida, keyingi 5 yil mobaynida Internet xalqaro tarmoqlariga ulanish bo‘yicha kanallarning umumiy tezligi 15 martadan ortiq oshirildi va hozirgi vaqtda 19 250 Mbit/s.dan iborat. Bu davrda 1 Mbit/s. uchun o‘rnatilgan tarif esa 14,5 marta kamaytirilib, 233,27 AQSh dollarini tashkil etmoqda.

O‘zbekiston Respublikasi Prezidentining 2013 yil 27 iyunda qabul qilingan PQ-1989-sonli “O‘zbekiston Respublikasining Milliy axborot-kommunikatsiya tizimini yanada rivojlantirish chora-tadbirlari to‘g‘risida”gi Qarorida belgilangan vazifalarni amalga oshirish maqsadida “O‘zbektelekom” AK tomonidan “Xalqaro paketli kommutatsiya markazini kengaytirish” loyihasi amalga oshirilishi, unga muvofiq mintaqalarda XPKMning yangi bog‘lamalari bosqichma-bosqich ishga tushirilishi rejalashtirilgan.

Mazkur loyihaning birinchi bosqichida Buxoro shahrida o‘tkazish qobiliyati kelajakda yanada kengaytirish imkoniyati bilan 40 Gbit/s. bo‘lgan XPKM yangi bog‘lamasining qurilishi yakunlandi.

XPKM bog‘lamalarini o‘zaro bog‘lash va O‘zbekiston Respublikasi telekommunikatsiya tarmoqlarini rivojlantirish uchun “O‘zbektelekom” AK Yaponiyaning NEC korporatsiyasi va Toyota Tsusho savdo uyi bilan hamkorlikda bir lyambdalarda 100 Gbit/s. tezlikdagi yangi DWDM-liniyasini foydalanishga topshirdi. Yangi liniya Respublika poytaxti – Toshkentni O‘zbekistonning tarixiy yodgorliklar maskani – Buxoro shahri bilan bog‘ladi.

Ta’kidlash zarurki, bu Markaziy Osiyo mamlakatlarida 100 Gbit/s.gacha tezlikda ishlaydigan birinchi tizimdir. Mazkur tizimda 10 Gbit/s.gacha tezlikda ishlaydigan an’anaviy DWDM-tizimlaridan katta farq qiladigan eng ilg‘or kogerent qabul qilish va uzatish texnologiyalari qo‘llanilgan.

Mazkur loyiha magistral aloqa liniyalari o‘tkazish qobiliyatini va ma’lumotlar uzatishni bir necha marta oshirdi, bu esa mamlakatimiz foydalanuvchilarining Internet-xizmatlariga ishonchli hamda yuqori tezlikda ulanishiga sharoit yaratilishiga yordam beradi.

“O‘zbektelekom” AK – butun O’zbekiston Respublikasi hududini o‘z tarmoqlari bilan qamrab olgan yirik telekommunikatsiyalar operatoridir. Kompaniya quyidagi xizmatlarni ko‘rsatadi: qayd etilgan va mobil aloqa operatorlari hamda provayderlariga kanallarni ijaraga berish xizmatlari, xalqaro va shaharlararo aloqa xizmatlari, ovozli aloqa va ma’lumotlar uzatish xizmatining barcha turlari, Internet tarmog‘idan foydalanish, videokonferensaloqa xizmatlari, CDMA-450 standartida mobil aloqa xizmatlarini taqdim etadi, televizion va radioeshittirish dasturlarini uzatish uchun kanallar tashkil etadi. Kompaniyaning bozordagi xizmatlari to’rtta — UZTELECOM™, UZMOBILE™, UZONLINE™ va TELECOM TV™ savdo belgilari ostida ko‘rsatiladi.

Orphus system
O'zbеkistonda AKT yangiliklaridan birinchilar qatorida xabardor bo'lish uchun Telegramda infoCOM.UZ kanaliga obuna bo'ling.
Telegramga qo`shmoq
WhatsAppga qo`shmoq
Odnoklassnikiga yubormoq
VKontakteda bo`lishmoq